2 Reyes 2 BDO1573

1. Y Aconteció, que quando quiſo Iehoua alçar à Elias en el toruellino àl cielo, Elias venia cõ Eliseo de Galgal.

2. Y dixo Elias à Eliseo: Quedate aora aqui, porque Iehoua me há embiado à Beth-el. Y Eliseo dixo: Biue Iehoua, y biue tu anima, que no te dexaré. Y decendieron à Beth-el.

3. Y ſaliendo los hijos de los prophetas, que eſtauan en Beth-el, à Eliseo, dixeronle: Sabes como Iehoua quitará oy à tu señor de tu cabeça? y el dixo: Si, yo lo ſe. callád.

4. Y Elias le boluió à dezir: Eliseo, quedate aqui aora, porque Iehoua me ha embiado à Iericho. Y el dixo: Biue Iehoua, y biue tu anima, que no te dexaré. Y vinieron à Iericho.

5. Y llegaronſe los hijos de los prophetas, que eſtauan en Iericho, à Eliseo, y dixeronle: Sabes como Iehoua quitará oy à tu señor de tu cabeça? Y el respondió: Si, yo lose: callad.

6. Y Elias le dixo: Ruegote que te quedes aqui: porque Iehoua me há embiado al Iordan. Y el dixo: Biue Iehoua y biue tu anima, que no te dexaré. Y anſi fueron ellos ambos.

7. Y vinieron cincuenta varones de los hijos delos prophetas, y parâronſe delante desde lexos: y los dos parâron junto àl Iordan.

8. Y tomando Elias ſu manto, doblólo, y hirió las aguas, las quales ſe partieron à la vna parte y à la otra: Y paſſâron ambos en seco.

9. Y como ouieron paſſado, Elias dixo à Eliseo: Pide loque quieres que haga porti, antes que ſea quitado de contigo. Y dixo Eliseo: Ruegote que las dos partes de tu eſpiritu ſean ſobre mi.

10. Y el le dixo: Cosa difficil has pedido. Si me vieres, quando fuere quitado de ti, serteha hecho anſi: mas sinó, no.

11. Y aconteció, que yendo ellos hablando, heaqui que, vn carro de fuego con cauallos de fuego apartó à los dos, y Elias subió àl cielo en vn toruellino.

12. Y viendolo Eliseo clamaua: Padre mio, padré mio carro de Iſrael y ſu gẽte de cauallo. Y nũca mas lo vido: y trauãdo de ſus veſtidos, rompiolos en dos partes.

13. Y alçando el manto de Elias, que ſe le auia caydo, boluióse, y parose à la orilla del Iordan.

14. Y tomando el manto de Elias, que sele auia caydo, hirió las aguas, y dixo: Donde eſtá Iehoua el Dios de Elias, tãbien el? Y como hirió las aguas, fueron partidas de la vna parte y dela otra, y Eliseo paſſó.

15. Y viendolo los hijos de los prophetas, que estauã en Iericho, de la otra parte, dixeron: El eſpiritu de Elias repoſa ſobre Eliseo. Y vinieronlo à recebir, y inclinaronſe àel en tierra:

16. Y dixeronle: Heaqui ay con tus sieruos cincuẽta varones fuertes, vayã aora, y bus quen à tu señor, por ventura lo ha leuantado el eſpiritu de Iehoua, y lo há echado en algun mõte, o en algun valle. Y el les dixo. No embieys.

17. Mas ellos lo importunaron hastaque auergonçandoſe dixo: Embiad. Entonces ellos embiaron cincuẽta hombres, los quales lo buscaron tres dias, mas no lo hallarõ.

18. Y como boluierõ àel, que ſe auia quedado en Iericho, el les dixo: Noos dixe yo, que no fuessedes?

19. Y los varones dela ciudad dixerõ à Eliseo: Heaqui la habitacion de eſta ciudad es buena, como mi señor vee, mas las aguas ſon malas, y la tierra enferma:

20. Entonces el dixo: Traedme vna botija nueua, y poned enella sal: y truxeronsela.

21. Y ſaliendo el à los manaderos delas aguas, echó dẽtro la sal, y dixo: Ansi dixo Iehoua: Yo sané estas aguas: y no aurá mas enellas muerte, ni enfermedad.

22. Y fueron sanas las aguas haſta oy, cõforme à la palabra que habló Eliseo.

23. Despues subió de alli à Bethel: y subiẽdo por el camino, ſalierõ los mochachos de la ciudad burlando deel, y diziendole: Caluo sube, caluo sube.

24. Y el mirando àtrás, vidolos, y maldixolos en el nõbre de Iehoua: y ſalieron dos oſſas del monte, y despedaçarõ dellos quarenta y dos mochachos.

25. De alli fue àl monte de Carmelo, y de alli boluió à Samaria.